娛樂圈不乏駐顏有術嘅男女明星，容顏二十年如同一日，一絲衰老跡象都無，睇到大家都好妒忌。為咗留住青春，唔少女性會大撒金錢去買昂貴嘅保養品，但其實食物先至係對抗衰老嘅關鍵！
 

想對抗衰老，我地就要清除身體中嘅自由基，佢係一種不成對電子嘅化合物。為咗保持穩定，自由基需要向外抓取電子，而呢個被稱為氧化嘅過程就會對人體中嘅正常細胞造成損害或突變引致疾病及老化。
 

想成功抗衰老嘅話，我地就要以抗氧化劑將自由基由身體中清除，而自然中有唔少食物都係擁有天然抗氧化劑。
 

#番茄

番茄中含有豐富茄紅素，而茄紅素嘅抗氧化能力係維他命C嘅20倍，絕對係抗氧化嘅高手，因為莙紅素係脂溶性，所以喺食之前一定要先將佢與油一齊烹調加熱，咁樣先可以將佢嘅抗氧化能力發揮得淋漓盡致。
 

#甜椒

甜椒含豐富嘅椒紅素、β-胡蘿蔔素及維生素C，可以活化細胞，延緩衰老。另外，甜椒亦對身體非常有益，佢能夠預防癌症及心血管疾病，並加強新陳代謝，令皮膚光滑柔嫩，頭髮亮麗。
 

#大蒜

雖然大蒜嘅味道唔係人人都接受到，但其實佢可以為我地帶嚟唔少好處。大蒜中嘅大蒜素及硒、鋅等物質，都係強力抗氧化劑，可以預防癌症，令血管擴張，降低血壓同埋膽固醇，仲可以提高免疫能力，守護你嘅身體。

#綠茶

綠茶當中蘊含兒茶素，令你嘅血管更加健康，包括增加血管韌性，以及預防血管硬化。更厲害嘅係佢可以防止細胞突變，抑制癌細胞嘅生成。除咗可以強身健體外，綠茶亦對美容養顏有幫助，飲多啲綠茶可以令皮膚變得光滑細緻咖。